BGA e Brezhoneg

[BDoon]

Mat ar jeu ?
Kinnig a ran diviz amañ e brezhoneg diwar-benn treiñ BGA e... brezhoneg !

[hoel8]

War-lec'h bezañ bet o kaozeal gant BDoon, sed aze un nebeut divizoù bet kemeret a-zivout an treiñ.

1) Klask ober gant troiennoù brezhonek, o pellaat diouzh ereadurezh ha troiennoù ar galleg.
Da skouer : Evit ur frazenn evel "${player} remporte la partie"e vo bravoc'h ober gant "Aet eo ar maout gant ${player}" eget treiñ ger 'vit ger "${player} a c'hounez ar bartienn".
2) Arabat klask pemp troad d'ar maout pa c'haller ober simpl hag arabat kaout aon ober simpl. Ar gerioù luziet ne vezont ket komprenet gant an nevezvrezhonegerien ha brav 'vije 'vije lod o teskiñ/pleustriñ ar yezh gant BGA en dazont.
D.s. "Entrez votre identifiant" = "Skrivit ho anv", ha mat-pell'zo, ha n'eo ket dav mont da dreiñ se dre "enankit ho anaouder", ne vo ket komprenet gant darn vrasañ an dud hep ur geriadur forzh penaos.
3) Ober ar muiañ posubl gant an anvioù-verb (infinitif) evit treiñ anvioù oberoù hag anvioù-kadarn evit treiñ anvioù-gwan.
D.s. "la compréhension" -> kalz simploc'h, bravoc'h, "brezhonekoc'h" eo ober gant "ar c'hompren" eget gant "ar c'homprenidigezh". Skarzhañ an traoù e -idigezh, -adur... pa c'haller. Memestra 'vit an anvioù gwan gant an traoù e -el -ek -adel... "problèmes techniques" -> kudennoù teknik a zo ken mat all pe gwell zoken evit "kudennoù teknikel"...
4) Graet 'vo gant ar stumm c'hoarier/ez evit chom hep lakaat ar c'hoarierezed a-gostez.
5) Implijet 'vo kentoc'h "troiad" eget "mañchad" evit treiñ "manche".

Komz eus an treiñ e Brezhoneg a vo graet amañ ha gellet 'vo ouzhpennañ pe resisaat "reolennoù" all tamm-ha-tamm.

Bec'h dezhi, ha bevet BGA e Brezhoneg !

[Comet_Hiker]

Ac'hanta tudoù!
Sur walc'h eo bet lakaet ar raktres-mañ a-gostez evit poent. Koulskoude, plij a rafe din gouzout ma 'z oc'h dedennet bepred evit labourat war an droidigezhioù-mañ.

[BDoon]

Degemer mat Comet_Hiker !

Ya, dedennet c'hoazh met amzer a vank. Hoel8 a zo bet o treiñ c'hoazh e 2020 hervez ar pezh 'm eus gwelet.
Mare 'zo e oamp bet gouest tizhout 80% deus al lec'hienn ziazez a-benn kregiñ gant treiñ c'hoari pe c'hoari. Diskennet eo da 71%. Poent kregiñ 'barzh adarre !
Ar reolennoù divizet gant Hoel8 a seblant din bezañ reizh c'hoazh. Posubl eo evel just cheñch troidigezhioù 'zo. Neuze eo pouezus displegañ perak, da heul an droidigezh (hag amañ ivez ma fell dit). Da skouer hiziv em eus gwelet e oa bet troet "badge" FR / "achievement" UK hervez 2 zoare gant Hoel8 : "trec'h" ha "disoc'h". Ar pezh a zo iskis. Cheñchet em eus evit implij "goprad" kentoc'h, o tisplegañ penaos "disoc'h" a zeu e fin ur jedad, hag ez omp gouest gounit ur goprad hep bezañ trec'h.

PS: ma fell dit gounit mizioù Premium buan hag aes, treiñ BGA e bzg a zo un doare a-feson

Kenavo